کورتەیەک لە ژیانی نوسەر لە سلێمانی لە دایکبووە و ھەر لەوێ خوێندنی سەرەتایی لە قوتابخانەی شێخ سەلام تەواوکردوە، دواتر لە « ناوەندی ئەزمڕ» خوێندوێتی و ئامادەییشی لە « ئامادەیی ھەڵکەوت» تەواوکردوە، لەزانکۆی سلێمانی و ھەولێر لە کۆلێژی زانستی بەشی جیۆلۆجی خوێندکاربووە. لەساڵی ١٩٨٣ دا لە خۆپیشاندانی زانکۆدا برینداردەبێت و زانکۆ جێدەھێڵێت. لە ساڵی ١٩٨٣ ـەوە تەواو خۆی بۆ کاری ئەدەبی تەرخاندەکات، لەو ساڵەدا قەسیدەی نیشتیمان دەنوسێت کە کۆنترین بەرھەمی بڵاوکراوەی نوسەرە و نۆ ساڵ دواتر بۆ یەکەمجار لە دیوانی « گوناھ و کەرنەفال» دا چاپدەکرێت. لە ساڵانی ھەشتادا نوسەر کۆمەڵێک قەسیدەی درێژ دەنوسێت، لەوانە « شار»، « گوناھ» ، «کەرنەفال» و چەندانی تر، دەستنوسی یەکەمی ڕۆمانی «مەرگی تاقانەی دووەم» یش ھەر دەگەڕێتەوە بۆ ئەوسەردەمە. لە پاییزی ساڵی ١٩٨٩ دا یەکەمین وتاری بە دوو بەش بە ناونیشانی « قسەکردن لە پەراوێزی بێدەنگی» دا لە ڕۆژنامەی «پاشکۆی عێراق»دا بڵاودەبێتەوە. لە ڕۆژانی سەرەتای ڕاپەڕیندا، لەگەڵ کۆمەڵێک نوسەری تردا ژمارە یەکی " گۆڤاری ئازادی" دەردەکەن کە دواتر پێنج ژمارەی لێ بڵاودەبێتەوە. لەساڵی ١٩٩٢ دا یەکەمین کۆمەڵە شیعری بەجۆرێکی ئێجگار سادە و سەرەتایی و بە تیراژێکی کەم چاپدەکرێت. لە نێوان ساڵانی ١٩٩٢ تا ١٩٩٤ چەندەھا کۆڕ و سیمینار لە ھەولێر و سلێمانی پێشکەشدەکات و ئیشەکانی لە پاڵ ئیشی کۆمەڵێک نوسەر و ڕۆشنبیری تردا وەک سەرەتای سەرھەڵدانی جۆرە تێڕوانینێکی دی بۆ ئەدەب و کۆمەڵگا سەیردەکرێن. دوای سەرھەڵدانی شەڕی ناوخۆ لە ئەیلولی ١٩٩٤ دا کوردستان بەجێدەھێڵێت و ڕوو دەکاتە سوریا، پاش نۆ مانگ ژیان لە دیمەشقدا دەگاتە ئەڵمانیا و تاساڵی ١٩٩٩ لە فرانکفۆرت نیشتەجێ دەبێت. لەو ماوەیەدا لەگەڵ کۆمەڵێک ھاوڕێی دیکەدا دەبێتە یەکێک لە دامەزرێنەرانی گۆڤاری ڕەھەند، لە ساڵی ١٩٩٨ یشدا ڕۆمانی « ئێوارەی پەروانە» دەنوسێت. لەساڵی ١٩٩٩ وە لە شاری کۆڵن نیشتەجێدەبێت. تا ئێستا ئەم بەرھەمانەی نوسەر چاپکراون: ١. « گوناھ و کەرنەفال ـــ شیعر» ٢. « مەرگی تاقانەی دووەم ـــ ڕۆمان» ٣. « ئێوارەی پەروانە ـــ ڕۆمان» ٤. « کۆی بەرھەمە شیعرییەکان ١٩٨٣ - ١٩٩٨» ٥. « دواھەمین ھەناری دونیا ــ ڕۆمان» ٦. « بۆھیمی و ئەستێرەکان ـــ شیعر» ٧. « ئیشکردن لە دارستانەکانی فیردەوسدا ـــ شیعر» ٨. « وەڵام لە ڕۆژگاری ونبوونی پرسیاردا ـــ سیازدە چاوپێکەوتن لەگەڵ       بەختیار عەلی» ٩. « ئیمان و جەنگاوەرانی ــ فیکری سەلەفی و دەرکەوتە نوێکانی لە ڕۆشبیریی      کوردیدا» ١٠. « خوێنەری کوشندە ـــ کۆمەڵە وتار» ١١. « شاری مۆسیقارە سپییەکان ـــ ڕۆمان» ١٢. « تا ماتەمی گوڵ … تا خوێنی فریشتە ـــ کۆی بەرھەمە شیعرییەکان        ١٩٨٣ ــ٢٠٠٤».  لە پاڵ ئەم بەرھەمانەدا نوسەر دەیان باس و لێکۆڵینەوەی درێژی لە گۆڤار و ڕۆژنامەکاندا بڵاوکردۆتەوە، بڕیارە لە ساڵی ٢٠٠٨ ــەوە پڕۆژەی کۆکردنەوە و لە چاپدانی کارە تیورییەکانی نوسەر لە کۆمەڵێک بەرگی تایبەتدا بۆ دووبارە کۆکردنەوە و بڵاوکردنەوە و ڕێکخستنی ئەو وتارانە لە لایەن چاپخانەی ڕەنجەوە لە سلێمانی دەست پێبکات.
	Copyright© bachtyar-ali.com. All rights reserved. Designed by AKAM EnG.